गोकुलगंगा गाउँपालिभित्र पहिलो पटक सडक कालोपत्रे हुँदै

१० पुस, रामेछाप ।
गोकुलगंगा गाउँपालिकाभित्र पहिलो पटक सडक कालोपत्रे हुने भएको छ । तीन नम्बर प्रदेशका आर्थिक मामिला तथा योजना मन्त्री कैलाश ढुंगेलको पहलमा विनियोजित चार करोड बजेटमा सडक कालोपत्रेको काम अगाडि बढेको हो ।

गाउँपालिकाको केन्द्र रस्नालुको छहरेदेखि भुजीडाँडासम्म १२ सय मिटर सडक कालोपत्रे गर्ने काम अगाडि बढेको गाउँपालिकाका अध्यक्ष खड्ग बहादुर सुनुवारले रामेछाप न्युजलाई बताउनुभयो । उहाँले भन्नुभयो,‘गाउँपालिकाभित्र सडक कालोपत्रेको काम धमाधम अगाडि बढेको छ, आगामी दिनमा थप सडकहरुको कालोपत्रेको लागि डिपिआर तयार पारेर प्रदेश सरकार र संघीय सरकारसँग योजना पेश गरेका छौं ।’

उहाँका अनुसार यस आर्थिक बर्षको लागि १२ सय मिटर सडक कालोपत्रे हुनेछ । अध्यक्ष सुनुवारले गाउँपालिकाभित्रको सबै वडाको टोलटोलसम्म सडक निर्माण गर्ने काम सम्पन्न भएकाले आफूहरुले स्तरउन्नतीको कामलाई प्राथमिकता दिएको बताउनुभयो । उहाँले भन्नुभयो,‘गाउँपालिकाभित्र पाँच सय किलोमिटर सडक निर्माण सम्पन्न गरेका छौ, अब सडकको नयाँ ट्रयाक खोज्दैनौ, भएका सडकलाई राम्रो बनाएर हिउद बर्षा नै सहज रुपमा यातायात सञ्चालन गर्ने बनाउछौं ।’