सूर्य चिन्ह हाम्रो हो, प्रचण्डले आँखा लगाउन पाउदैननः नेता बस्नेत

१५ माघ, रामेछाप ।
नेकपा ओली समुहका युवा नेता महेश बस्नेतले सूर्य चिन्हमा आँखा नलगाउन प्रचण्ड–नेपाल समुहलाई चेतावनी दिएका छन् । उनले सूर्य चिन्ह प्रधानमन्त्री केपी शर्मा ओलीले नेतृत्व गरेको नेकपाका हुने बताउदै प्रचण्डलाई आँखा नलगाउन चेतावनी दिएका हुन् ।

मन्थलीमा आज आयोजित युवा विद्यार्थीको भेलालाई सम्बोधन गर्दै नेता बस्नेतले प्रचण्डसँग माधव कुमार नेपाल र झलनाथ खनाललाई कन्यादन गरेर पठाउन तयार भएपनि नाम र गोत्र दिन नसकिने बताए । उनले भने,‘माधव नेपाल र झलनाथलाई कन्यादान गरेर पठाइन्छ, सकेको सम्पत्ति पनि दिइन्छ तर नाम र गोत्र दिन सकिदैन, बल्खुको पार्टी कार्यालय हाम्रो हो, सूर्य चिन्हमा कसैले पनि आँखा नलगाउदा हुन्छ ।’
निर्वाचन आयोगले दुई अध्यक्ष र महासचिव भएको पार्टीलाई नै आधिकारिता दिएको बताउदै वस्नेतले प्रचण्डलाई नैतिकता भए नयाँ पार्टी खोल्न चेतावनी दिए । उनले प्रचण्डलाई सूर्य चिन्हको माया नभएको बताउदै नेपाल र खनाललाई फकाउन सूर्य चिन्ह दावी गरेको बताए ।