निर्वाचनमा शान्ति सुरक्षामा खलल पुग्ने काम गरे प्रशासनले ‘एक्सन’ लिन्छः प्रजिअ खत्री

रामेछाप जिल्लामा चुनावी माहाले छाएको छ । स्थानीय तहको निर्वाचनको लागि राजनीतिक दलहरुले उम्मेदवार छनोट गरिसकेका छन् । जिल्लामा मुख्य निर्वाचन अधिकृत,  ६ गाउँपालिका र २ नगरपालिकामा निर्वाचन अधिकृतको कार्यालय स्थापना भइसकेको छ ।   निर्वाचनका लागि जिल्ला निर्वाचन कार्यालय रामेछापले मतदाता शिक्षा कार्यकर्ता र मतदाता स्वमसेवक खटाएको छ । रामेछाप जिल्लामा २ लाख ७ हजार जनसंख्या रहेको छ । वैशाख ३१ गने हुने स्थानीय तहको निर्वाचनमा रामेछापको ८ स्थानीय तहबाट १ लाख ३४ हजार ६ सय २० जना मतदाता रहेका छन् । स्थानीय तहको निर्वाचनको लागि जिल्ला निर्वाचन कार्यालय रामेछापमा १७ राजनीतिक दलले दल दर्ता गराएका छन् । जिल्ला प्रशासन कार्यालयले जिल्लामा निर्वाचनको लागि सुरक्षा रणनीति अगाडि सारिसकेको छ ।

जिल्ला प्रशासन कार्यालयले निर्वाचनमा स्वच्छ र भय रहित  ढंगले सम्पन्न गराउनको लागि पटक–पटक सर्वदलिय बैठकको आह्वान गर्दै आएको छ । स्थानीय तहको निर्वाचन, जिल्लामा शान्ति सुरक्षाको अवस्था र जिल्ला प्रशासन कार्यालयले लिने नीति लगायतको विषयमा केन्द्रीत रहेर रामेछापका प्रमुख जिल्ला अधिकारी सूर्यबहादुर खत्रीसँग रामेछाप न्युजले गरेको कुराकानीः–

निर्वाचनको तयारी कुन रुपमा अगाडि बढ्को छ ?
–स्थानीय तहको निर्वाचनको लागि जिल्लास्थित राजनीतिक दलका नेताहरुसँग पटक–पटक छलफल गरेका छौं । कार्यालय प्रमुख गैर सरकारी संस्था सहितसँग छलफल गरेर निर्वाचनलाई कसरी भयरहित ढंगले शान्तिपूर्ण र स्वच्छ वातावरणमा कसरी सम्पन्न गर्न सकिन्छ भन्ने परामर्श गरेका छौं ।
विना डर त्रास मतदान गर्ने वातावरण सृजना गर्न नै हाम्रो ध्यान केन्द्रीत भएको छ । निर्वाचनको लागि हामीले सुरक्षा योजना तयार गरेका छौं । स्वच्छ र निष्पक्ष बनाउने हामी सबैको प्रयास भइरहेको छ । राजनीतिक दलहरुको सहयोग प्राप्त गरेर त्यस अनुसार निर्वाचनलाई सफल बनाउने हाम्रो प्राथमिकता हो ।

नयाँ संरचना अनुसार स्थानीय तहको निर्वाचन हुने लागेको छ । के कस्ता चुनौती रहेका छन ?
–विगतको भन्दा केही फरक ढंगेको स्थानीय तहको निर्वाचन हुँदैछ । २०७० मा संविधानसभाको निर्वाचन भएको थियो । अहिले आफनै घर दैलोमै जनप्रतिनिधि चुनिदै छन् । विकास निर्माणमा प्रत्यक्ष रुपमा सरोकार राख्ने, संविधान अनुसार शक्तिशाली स्थानीय तहको निर्माण भएको छ । यो निर्वाचनमा जनताको अझ बढी सरोकार हुन्छ । यो निर्वाचन अझ बढी उत्साहपूर्ण हुनेछ ।
१९ बर्षपछि हुन लागेको निर्वाचनमा चासो र सक्रियता बढी देखाउने हुनाले विगतको चुनाव भन्दा यो चुनाव अझ बढी संवेदनशिल हुन्छ । अझै बढी चुनौतीपूर्ण हुन्छ । चुनौतीलाई व्यवस्थापन गर्ने काममा हामी लागेका छौं । अहिलेको निर्वाचन भनेको सम्बन्धित स्थानीय तहमा कर्मचारी खटिन्छन् । वैशाक १९ गते उम्मेदवारको मनोनय दर्ता गर्ने कार्यक्रम छ ।  स्थानीय तहमै उम्मेदवारको मनोनय दर्तादेखि अन्तिम नामावली प्रकाशन गर्ने, मतगनणा गरेर निर्वाचन परिणाम समेत घोषणा गरेर आउने छन् । लामो अवधिसम्म कर्मचारी त्यहाँ बस्ने हुँदा  त्यहाँ कर्मचारीको सुरक्षा गर्ने,मतपेटीकालाई केन्द्रमा ल्याएर मतपरिणाम घोषणा गरेर आउने कारण गत संविधान सभा  निर्वाचन भन्दा जटिल र संवेदनशिल छ ।

जिल्लाको ८ स्थानीय तहमा कति सुरक्षाकर्मी परिचालन हुन्छन ?
–मोटामोटी तयारी गरेका छौं । जिल्लाको सुरक्षा योजना बनाएका छौं । सुरक्षाकर्मीको तथ्याङक सार्वजनिक गरेका छैनौ । जिल्लामा भएको भन्दा बढी सुरक्षाकर्मी चाहिने भएकाले केन्द्र र क्षेत्रसँग समन्वय गरेका छौं । निर्वाचनमा प्रभावकारी सुरक्षा प्रदान गछौं ।

राजनीतिक दललाई के भन्न चाहनुहुन्छ ?
–स्वच्छ प्रतिस्पर्धा मार्फत आफ्नो कार्यक्रम लिएर जानुहोस् । अस्वस्थ प्रतिस्पर्धा नगर्नुहोस । एक आपसमा द्धन्द्ध फैलाउने क्रियाकलापहरु नगर्नुहोस । आमसभा र कार्यक्रम गर्दा निर्वाचन आयोगले तोकेको आचारसंहिता अनुसार गर्नुहोस् । स्थानीय प्रशासनसँग समन्वय गरेर कार्यक्रम सञ्चालन गर्नुहोस । कुनै पनि सार्वजनिक स्थलमा कार्यक्रम गर्नु ४८ घण्टा अघि प्रशासनलाई जानकारी गराउनु पर्छ । कुनै खालको घटनाले शान्ति सुरक्षामा  खलल पुग्ने अवस्था भयो त्यति बेला प्रशासनले कडा भन्दा कडा कारवाही गर्छ । त्यति बेला तपाईहरुका कार्यकर्ता समस्यामा  पर्न सक्छन् । स्वच्छ प्रतिस्पर्धा मार्फत हार्दिकतापूर्वक आफ्ना कार्यक्रमहरु गर्नुहोस् । जनताको मन जितेर मत ल्याउने हो । दबाब दिएर मत ल्याउने होइन । शान्ति सुरक्षामाथि खलल पुग्ने काम भयो भने प्रशासनले एक्सन लिन्छ । राजनीतिक दलहरुले आफ्नो कार्यकर्तालाई सम्झाउने काम गर्नुहोस । रामेछापमा राजनीतिक दलहरुकोबीचमा तिक्क्तता छैन् । सौर्हादता छ । एक आपसमा नराम्रो छैन् । मेलमिलापको व्यवहार देखेको छु । राजनीतिक दलको द्धन्द्ध भएको देखिएको छैन । यो राम्रो पक्ष हो ।
मतदान केन्द्रको सुरक्षाको लागि के कस्तो योजना अगाडि सानुभएको छ ?
–हामीले पूर्ण रुपमा तयारी गरेका छौं । मतदान केन्द्रमा गएरे निर्धक्कसँग मतदान गर्ने वातावरण प्रशासन तयार गर्छ । सबै मतदातालाई स्वतन्त्रतापूर्वक ढुक्क भएर मतदान खसाल्न पाउछन् । सुरक्षा दिने काम हाम्रो हो । बढी भन्दा बढी मत खसाल्ने काम राजनीतिक दलहरुको हो ।