रामेछापमा दुई युवाले मध्यरातमा मच्चाए वितण्डा

१० असार, रामेछाप ।
मध्यरातमा मार्थक पदार्थ सेवन गरी पार्किङ गरिराखेको मोटरसाइकलमा आगो लगाउने दुई युवा पक्राउ परेका छन् । रक्सी खाएर मोटरसाइकलमा आगो लगाउने खाँडादेवी गाउँपालिका–३ भिरपानीका दुई जनालाई प्रहरीले पक्राउ गरेको हो ।

बुधवार मध्यरातमा खाँडादेवी गाउँपालिका वडा नम्बर ३ आपचौर स्थित बाटो नजिकै मिनबहादुर कार्कीले घर नजिकै पार्किङ गरेर राखेको बा १९ प ७१ नम्बरको मोटरसाइकलमा सोही वडाका पदम बहादुर कार्की र सोही वडाका लक्ष्मण खत्रीले आगो लगाएको आरोपमा पक्राउ परेका छन् । त्यसैगरी उनीहरुले प्रदेश ३–०२–०१३प १३ नं. को मोटरसाइकलमा तोडफोड गरेर फरार भएपछि विहिवार सित्खाबाट प्रहरीले नियन्त्रणमा लिएको थियो ।

जिल्ला प्रहरी कार्यालय रामेछापका प्रवक्ता श्रीशकंर श्रेष्ठले मोटरसाइकलमा आगजनी गर्ने र तोडफोड गर्ने दुई जनालाई पक्राउ गरिएको बताए । उनका अनुसार पक्राउ परेका दुई जनामाथि जिल्ला अदालतबाट दिन ७ दिनको म्याद थप भइ अनुसन्धान सुरु भएको छ । पक्राउ परेका कार्की र खत्रीले रक्सी नसामा मोटरसाइकलमा आगजनी र तोडफोड गरेको प्रहरीलाई बयान दिएका छन् ।