रामेछापको ठाउँठाउँमा सडकमा पहिरो, रातकाे समयमा यात्रा नगर्न आग्रह

२ कात्तिक, काठमाडौं ।
अविरल बर्षाको कारण रामेछापका मुख्य सडकमा पहिरो खसेको छ । केही ठाउँमा आज दिउसो खसेको पहिरो पन्छाएर यातायात सुचारु गरिएको छ । केही ठाउँमा पहिरो आउने सम्भावना रहेको कारण रातीको समयमा यात्रा नगर्न जिल्ला प्रहरी कार्यालय रामेछापले नागरिकलाई आग्रह समेत रेको छ ।

मन्थली खुर्कोट सडक खण्ड अन्तर्गत बर्षाको कारण मन्थली नगरपालिका–६ कुनौरीमा खसेको पहिरो मन्थली नगरपालिकाको सक्रियतामा पन्छाइएको छ । सडक डिभिजन कार्यालयको लेडर प्रयोग गरेर दिउसो खसेको पहिरो पन्छाएर साँझबाट दुवैतर्फ यातायात सञ्चालनमा आएको छ ।

त्यसैगरी मन्थली–खिम्ती सडक खण्ड अन्तर्गत मन्थली नगरपालिका–२ बान्देमा सडक भन्दा माथिबाट पहिरो खसेको कारण अवरुद्ध भएको सडक पन्छाउने काम पनि सम्पन्न भएको छ । जिल्ला प्रहरी कार्यालय रामेछापका प्रवक्ता श्रीशकंर श्रेष्ठले खिम्ती मन्थली सडक खण्डमा साँझ एकतर्फी रुपमा यातायात सुचारु भएको छ ।