६ दिनदेखि वेपत्ता रामेछापका मानन्धर भेटिए, चिन्तामा डुबेको परिवारमा खुसीयाली

११ फागुन, रामेछाप ।
छ दिन अघि आफ्नै घरबाट हराएका दिपेश मानन्धर भेटिएका छन् । रामेछाप मन्थली नगरपालिकाबाट २५ बर्षिय मानन्धर गति विहिवार बिहानबाट घरबाट बाहिर निस्किएपछि परिवारको सम्पर्कमा थिएनन् । घरमै मोबाइल छोडेर सम्पर्क विहीन भएका मानन्धर आज मन्थली नगरपालिकाको भैसैश्वरमा भेटिएका हुन् । घरबाट सम्पर्क विहीन भएपछि उनको परिवारको साथै जिल्ला प्रहरी कार्यालय रामेछापले टोली परिचालन गरेरै तीब्रता दिएको थियो ।

सुनापति गाउँपालिका–५ रुपाकोट स्थायी घर भइ हाल मन्थली नगरपालिकामा बस्दै आएका मानन्धर आज फेला परेको जिल्ला प्रहरी कार्यालय रामेछापका डिएसपी राजकुमार थिङले रामेछाप न्युजलाइ बताए । उनका अनुसार अहिले मानन्धर आफ्नै घरमा रहेका छन् । दिपेश भेटिएसँगै चिन्तामा डुबेको परिवारमा खुसीयाली छाएको छ । उनको परिवारले खोजी कार्यमा सहयोग गर्ने सम्पूर्णलाई धन्यवाद दिएको छ ।