मतपत्रमा मतदान अधिकृतले हस्ताक्षर नगरेको भेटिएपछि रामेछापको मनगणनास्थलमा तनाब

२३ मंसिर, रामेछाप ।
रामेछापमा मतगणना भइरहदा मतदान अधिकृतले हस्ताक्षर नगरेको मत फेला परेपछि हंगमा भएको छ । मतगणनाको क्रममा खाँडादेवी गाउँपालिका–८ गागलको महाङकाल मतदान केन्द्रमा मतपत्रमा हस्ताक्षर नभएको फेला परेपछि केही बेर तनाब भएको थियो । मतदान केन्द्रको ‘क’ र ‘ख’ बुथमा माओवादी केन्द्र चिन्ह हसियाँ हतौडामा खसेको ३७ मतमा हस्ताक्षर नभएको फेलापरेपछि बाम गठबन्धनका प्रतिनिधिहरुले आपत्ति जनाएका छन् ।
बाम गठबन्धनले अग्रता लिएरहेको बेला अचानक हस्ताक्षर नभएको मतपत्र फेला परेपछि बाम गठबन्धनका नेताहरुले मुख्य निर्वाचन अधिकृत कृष्णप्रसाद पौडेलको ध्यानाकर्षण गराएका थिए । नियम अनुसार मतदान अधिकृतले हस्ताक्षर नगरेको मतपत्र गणना गरिदैन । उक्त बुथमा हसिया हतौडामा ३४, हसिया तारामा २ र रुखमा १ वटा मतपत्रमा मतदान अधिकृतले हस्ताक्षर नगरेको पाइएको हो ।

खाँडादेवी गाउँपालिका–८ को मतदान केन्द्रको ‘क’ बुथमा मतदान अधिकृतको रुपमा निलकण्ठ पुरी र ‘ख’ मतदान केन्द्रमा मतदान अधिकृतको रुपमा वासुदेव सापकोटा रहेको खुलेको छ । दुवै जना कांग्रेस निकट शिक्षक संघमा आबद्ध रहेको बताइएको छ ।
माओवादी केन्द्रले दुवै जना मतदान अधिकृतले कांग्रेसका उम्मेदवार कान्छाराम तामाङसँग पैसा खाएर बाम गठबन्धनलाई हराउन मतपत्रमा हस्ताक्षर नगरेको आरोप लगाएको छ । नेकपा माओवादी केन्द्रका नेता टंकलाल घिसिङ टकलले मतपत्रमा हस्ताक्षर नगर्नु निन्दनीय, अराजनीतिक र षडयन्त्रको पराकाष्ठा भएको बताए ।
उनले रामेछाप न्युजसँग भने,‘पैसाको किनबेच भएकाहरुबाट मतपत्रमा हस्ताक्षर नभएको हो भन्ने हाम्रो निष्कर्ष छ ।’ उनका अनुसार मुख्य निर्वाचन अधिकृतको कार्यालयले मतपत्रमा हस्ताक्षर नगर्ने मतदान अधिकृतलाई कानुन अनुसार हदैसम्म कारवाही हुने प्रतिबद्धता जनाएको छन् । निर्वाचनमा एक मतले नै हार जित हुने अवस्थामा मतदान अधिकृतले मतपत्रमा हस्ताक्षर नगरी बाम गठबन्धन हराउने षडयन्त्रमा लागेको भन्दै तत्काल दोषीमाथि कारवाही गर्न बाम गठबन्धनले निर्वाचन अधिकृतको कार्यालयसँग माग गरेको छ ।