सुनापती गाउँपालिकालाई निशुल्क जग्गा दिन तामाङको संयोजकत्वमा बन्यो उपसमिति

२६ वैशाख, रामेछाप ।
रामेछापको सुनापती गाउँपालिकालाई निशुल्क रुपमा जग्गा उपलब्ध गराउन हिलेदेवीका स्थानीय जुटेका छन् । गाउँपालिकाको बैठकले सात दिनभित्र निशुल्क रुपमा जग्गा उपलब्ध गराउन स्थानीय बिबी तामाङको संयोजकत्वमा नौ सदस्यीय जग्गा खोजबिन समिति गठन गरेको हो ।
समिति गठन भएलगत्तै गाउँपालिकाको केन्द्र रहेको हिलेदेवीको साँदीडाँडा आसपासको क्षेत्रमा नै जग्गा उपलब्ध गराउने छलफल सुरु भएको छ । हाल स्वास्थ्य चौकी रहेको क्षेत्रमा आसपासभित्र नै जग्गा उपलब्ध गराउनको लागि समितिले काम अगाडि बढाएको छ ।

गाउँपालिकाले जग्गा उपलब्ध गराइदिन स्थानीयसँग आग्रह गरेको छ । सकेसम्म निशुल्क जग्गा लिने नीति अनुसार गाउँपालिकाले यस्तो निर्णय गरेको हो । गाउँपालिकाले तोकेको मापदण्डभित्र रहेर एक साताभित्र नै गाउँपालिकालाई जग्गा उपलब्ध गराउने उपसमितिका संयोजक बिबी तामाङले रामेछाप न्युजलाई बताए ।

गाउँपालिका अन्तर्गत निर्माण हुने सरकारी कार्यालयहरु निर्माणको लागि कम्तिमा पनि ७० रोपनी जग्गा आवश्यक पर्ने गाउँपालिकाले बताएको छ । संयोजक तामाङले जग्गा उपलब्ध गराउने विषयमा आजैबाट छलफल सुरु गरेको बताए । उनले भने,‘७० रोपनी जग्गा नै गाउँपालिकालाई उपलब्ध गराउछौ, सकेसम्म एउटै क्षेत्रमा जग्गा उपलब्ध गराउछौ, यदी केही पुगेन भने नजिकैको क्षेत्र मिलाएर भएपनि गाउँपालिकालाई निशुल्क रुपमा जग्गा उपलब्ध गराउछौ ।’