‘चुनावमा गरेको प्रतिबद्धता अनुसारकै काम गरेको छौ’

निर्वाचनमा गरेको प्रतिबद्धता अनुसारको विकास निर्माणको चाहना नागरिकहरुले राखेका छन् । सडक, विद्युत, खानेपानी, स्वास्थ्य, शिक्षा, कृषि लगायतको क्षेत्रमा नागरिकहरुले परिवर्तन खोजेका छन् । स्थानीय तहमा जननप्रतिनिधिहरुले जिम्मेवार सम्हालेको पनि वीस महिना भन्दा बढी भइसकेको छ । यस बीचमा जनप्रतिनिधिहरुले केही कोशित त गरेका छन् । तर जनअपेक्षा अनुसारको काम हुन नसकेको गुनासो भने हुँदै आएको छ । अधिकार सम्पन्न स्थानीय तहले यस बीचमा काम गर्ने जमर्को त गरेको छ । तर स्पष्ट लक्ष्य र योजनाको अभाव पनि खडकिएको छ । सुनापती गाउँपालिका–५ खनियापानीमा पनि विकास निर्माणको कामले विस्तारै गति लिन थालेको छ । यसै विषयमा वडाभित्रको विकास निर्माणको अवस्था, समस्या र आगामी दिनको योजना लगायतको विषयमा केन्द्रीत भएर सुनापती गाउँपालिका–५ खनियापानीका वडा अध्यक्ष ठूलोकान्छा तामाङसँग रामेछाप न्युजको लागि स्नेहा सिलवालले गरेको कुराकानीः–

निर्वाचनको क्रममा जनतासँग गरेको प्रतिबद्धता अनुसार कति काम गर्नुभयो ?
–निर्वाचनमा गरेको प्रतिबद्धता अनुसारको काम गरिरहेका छौं । सीमित स्रोत र साधनबाट धेरै आवश्यकता पूरा गर्नुपर्ने अवस्था छ । हिजो बोलेको कुरा र आज काम गर्नको लागि केही फरक पर्दौ रहेछ । हामीमा सुरुमा अनुभवनको कमी, नयाँ संरचनाको कारण केही कठिनाई पनि भयो । तर अहिले हामीले यस बीचमा बटुलेको अनुभव अनुसार काम अगाडि बढाएका छौं । जनताको न्युनतम आवश्यकतालाई मध्येनजर गरेर काम गरिरहेका छौं । अपेक्षा र आकांक्षा धेरै छन् । मुख्य आवश्यकता पहिचान गरेर स्पष्ट लक्ष्य र योजना सहित अगाडि बढेका छौं । वडाको भौगोलिक अवस्था पनि एकै खालको छैन् । भौगोलिक अवस्था अनुसारको काम गर्नुपर्ने बाँध्यता पनि हामीसँग छ ।
स्वास्थ्य क्षेत्रको रहेको समस्या समाधान गर्नको लागि के काम गर्नुभयो ?
–वडाभित्र रुपाकोट स्वास्थ्य चौकी मात्र रहेको थियो । अहिले हामीले भिरकोटमा गाउँघर क्लिनिक सञ्चालनमा ल्याएका छौं । साविकबो १,२ र ३ नम्बर वडाका जनतालाई यसले फाइदा गरेको छ । स्वास्थ्यजस्तो संवेदनशील विषयलाई हामीले गम्भीरतापूर्वक लिएका छौं । भिरकोटमा अहेवको दरबन्दी कायम गरेर सेवा सञ्चालन भएको छ । त्यसैगरी वडाभित्र अन्य क्षेत्रमा पनि थप स्वास्थ्य इकाई निर्माण गरेर सेवा सञ्चालन गर्ने सोच बनाइरहेका छौं । सरकारले उपलब्ध गराएको निशुल्क औषधी उपलब्ध गराउने, प्राथमिकत उपचार गाउँघरमा नै उपलब्ध गराउने हाम्रो मुख्य उदेश्य रहेको छ ।
वडाभित्र सबै क्षेत्रमा सडक पुग्यो कि पुगेन ?
हामीले जिम्मेवारी बहन गरेपछि पहिलो प्राथमिकता सडक निर्माणको कामलाई दियौ । किनभने भुकम्पको कारण भत्किएको घर निर्माणको लागि निर्माण सामाग्री पुर्याउन सहज होस भनेर सकेसम्म टोलटोलमा नै सडक निर्माणको काम अगाडि बढायौ । अहिले वडाको सबै क्षेत्रमा सडक पुगेको छ ।
वडाभित्र मापदण्ड विपरीत सडक निर्माण गर्दा जोखिम पनि बढ्यो भन्छन नि ?
–विकासको लागि सडक मुख्य आवश्यकता हो । आवश्यकता भएर नै निर्माण गरेका हौ । हो, सडक निर्माणले केही ठाउँमा जोखिम पनि बढाएको छ । हामी त्यसको व्यवस्थापन गर्ने काममा जुटेका छौं । गाउँपालिकाबाट नै निर्णय भएको छ अब सडक नयाँ ट्रयाक निर्माण गर्ने होइन, भएका सडकको स्तरउन्तती गरेर अगाडि बढने हो । अब वडाभित्र जति पनि सडक बनेका छन् । ती सडक मध्ये पनि मुख्य सडक छनोट गरेर त्यसलाई व्यवस्थित गर्ने हो । नालाको व्यवस्थापन गर्ने, लेबल मिलाउने लगायतको काम अगाडि बढाउछौ ।
वडाभित्र सबै क्षेत्रमा विद्युतीकरण भयो ?
निर्वाचनको क्रममा गरेको प्रतिबद्धता मध्ये विद्युतीकरण पनि थियो । हाम्रो पहलमा अहिले विद्युतीकरण हुन नसकेको सबै क्षेत्रमा विद्युतीकरण भएको छ । केही क्षेत्रमा मिटर बक्स पुग्न बाँकी छ । त्यसको लागि पनि विद्युत प्राधिकण कार्यालय रामेछापसँग समन्वय गरेर काम गरिरहेका छौं ।
खानेपानीको समस्या समाधान गर्न के सोच्नु भएको छ ?

––वडाभित्र माथिल्लो क्षेत्रमा खानेपानीका मुहान भएको कारण धेरै ठूलो समस्या छैन् । तर भुकम्पको कारण केही पानीको मुहानहरु सुकेका छन्, जसको कारण केही समस्या सृजना भएको । तत्कालको लागि वडाले खानेपानी व्यवस्थापन गर्नको लागि काम अगाडि बढाएको छ । गोपीखोला हात्तीछाँगा हुँदै साविक १,२,३ को जनताको लागि खानेपानी सेवा दिनको लागि योजना अगाडि बढाएका छौं । धुईस्युङ खोला खानेपानी आयोजनालाई स्तरउन्तती गरेर साविक ४,५,६,७,८ साविकाका वडाहरुमा खानेपानी सेवा उपलब्ध गराउने योजना पनि अगाडि बढाउदैछौ । साविक ९ नम्बर वडाको लागि लुभु घट्टा खोला लिफ्ट खानेपानी आयोजना निर्माण गर्ने काम अगाडि बढाइएको छ । सिडिएस संस्था, वडा कार्यालय, गाउँपालिका र उपभोक्ताको त्रिपपक्षीय साझोरीबाट खानेपानीको पूर्ति गर्न काम सुरु गरिसकेका छौं । अब मिटर सिस्टमबाट खानेपानी वितरण गछौं । वडाको सबै क्षेत्रमा खानेपानी पर्याउनको लागि दिर्घकालीन रुपमा सुनकोसी लिफ्ट वृहत्त खानेपानी आयोजना निर्माण गर्ने योजना अगाडि सारिएको छ ।

कृषि क्षेत्रको सुधारको लागि के योजना अनुसार काम गरिरहनुभएको छ ?
–हाम्रो वडाको विकास गर्ने भनेको कृषि क्षेत्रलाई आनुधिकरण गरेर नै हो । कृषि क्षेत्रमा युवाहरुको आकर्षण देखिदैन । गाउँमा अहिले युवाहरु विहीनको अवस्था छ । रोजगारीको लागि विदेशको संख्या ठूलो छ । कि त युवाहरु विदेश भएका छ कि त वडाका मासिनहरु शहर केन्द्रीत भएर व्यापार व्यवसाय गरिहेका छन् । गाउँ फर्काएको लागि हामीले केही योजना अगाडि सारेका छौं । गाउँमा अहिले बृद्धाबृद्धा मात्र छन् । हामीले घरघरमा भन्दा पनि नमूनाको रुपमा सामुहिक रुपमा कृषि फर्म सञ्चालन गर्ने सोच बनाएका छौं । खनियापानीलाई बेसार पकेट क्षेत्र घोषणा गरिएको छ । बेसारको विऊ पनि वितरण गरेका छौं । वडामा तरकारी संकलन केन्द्र पनि निर्माण गर्ने योजना छ । सिंचाईलाई थप व्यवस्थित गर्ने , दुध डेरी सञ्चालन गरेर कृषकहरुको आम्दानी बढाउने र राम्रोे काम गर्ने कृषकहरुलाई पुरस्कृत गर्दै जाने योजना छ ।