‘दोरम्बा गाउँपालिकाको गुन्सालमा सिमेन्ट उद्योग सञ्चालन गछौं’

रामेछापको दोरम्बा गाउँपालिका विस्तारै विकास निर्माणको गतिमा अगाडि बढेको छ । जनप्रतिनिधिहरुलाई अहिले योजना छनोट गर्ने चटारो छ । गाउँपालिकाले विकासको आधार तय गरेपनि कार्यान्वयको प्रक्रिया भने प्रभावकारी रुपमा अगाडि बढाउन सकेको छैन् । कृषि र पर्यटनलाई गाउँपालिकाले समृद्ध बनाउने आधार बनाए पनि अझै विकासको प्राथमिकता भने छनोट गर्न सकेको छैन् । विगतमाझै स–सना योजनाहरु समावेश गरेर बजेट बनाएको छ । यसै विषयमा दोरम्बा गाउँपालिका–५ गुन्सालका वडा अध्यक्ष गंगाबहादुर तामाङ ‘कमान’सँग रामेछाप न्युजको लागि स्नेहा सिलवालले गरेको कुराकानीः–

सडक निर्माणमा वडाले लगानी गरेपनि परिणाम खासै आएन भन्छन नि ?
–सडक निर्माण गरिएको छ । अब सडकको स्तरउन्नती गर्ने प्रक्रियामा हामी लागेका छौं । सडकको पहुँच नपुगेको वस्तीमा सडक पुर्याउने अभियानमा छौं । वडाको केही भागमा अझै सडक पुग्न बाँकी छ । यस बर्ष बजेट छुटयाइएको छ ।
विद्युतीकरण नि ?
साविकको गुन्सी ८ र ९, टोकरपुरको ८ र ९ चार वटा वडा मिलेर अहिलेको दोरम्बा गाउँपालिकाको पाँच नम्बर वटा बनेको हो । साविक गुन्सीको ८ नम्बर वडामा २०६६ सालबाट नै बिजुली बलेको हो, अलिपछि गुन्सालमा पनि बल्यो । विद्युतीकरणको काम केही बाँकी छ । अबको पाँच छ महिनाभित्र विद्युत बल्छ ।
खानेपानीको समस्या कस्तो छ ?
–गुरासेमा खानेपानीको समस्या धेरै छ । करिब किलोमिटर दुरी रहेको साल्मीबाट पानी ल्याउने प्रयास गर्दै छौँ । २०६६ सालदेखि काम अगाडि बढेपनि अहिलेसम्म पूरा भएको छैन् । हामी पूरा गर्ने अभियानमा लागेका छौं । यस बर्ष गाउँपालिकाले पनि बजेट छुटयाएको छ । अब गुरासे आसपासका बासिन्दाहरुले सहज रुपमा खानेपानी उपभोग गर्न पाउछन् ।
वडा नम्बर ५ मा रहेको गुरासे धार्मिक पर्यटकीय गन्तव्य पनि हो यसको विकासको लागि के योजना बनाइरहनुभएको छ ?
–धार्मिक र ऐतिहासिक गुरासे मन्दिर निकै पुरानो मानिन्छ । धार्मिक आस्था र विश्वास लिएर आन्तरिक एवं बाह्य भक्तजनहरु ऋाउने गरेका छन् । शक्तिको प्रतिकको रुपमा पनि गुरासेलाई लिने गरिन्छ । खुडकिला निर्माण गर्न पाँच लाख बजेट छुटयाएका छौं । यसलाई धार्मिक पर्यटकीय क्षेत्रको रुपमा विकास गरेर अगाडि बढाउने योजना हामीले बनाएका छौं । यस क्षेत्रको गुरु योजना बनाएर नै काम गछौं ।
गाउँघरमा नै रोजगारी सृजना गर्न के गर्नुभयो त ?
वडाभित्र रोजगारी सृजना गर्न हामीले गुराँसे युवा समाज भन्ने एउटा संस्था दर्ता गरेका छौँ । सरकारको नियम कानुन अनुसार दर्ता भएको संस्था हो । त्यस संस्थाबाट बाख्रा पालनको काम अगाडि बढाएका छौं । बाख्रा पालनको लागि छ वटा घर निर्माण गरेर व्यावसायिक रुपमा बाख्रा पालन अगाडि बढाएका छौं ।
धेरै योजना बनाएर भौतारिनु भन्दा पनि यसलाई कसरी एउटा नमुनाको रुपमा विकास गरेर विदेश जाने युवाहरुलाई गाउँघरमा नै रोजगारी सृजना गर्न सकिन्छ भन्ने गृहकार्यमा हामी लागेका छौं । रोजगारीका केही आधारहरु तयार गरेका छौं । मुख्य रुपमा बाख्रा पालन मार्फत विदेश जाने युवाहरुलाई हामी रोक्छौ ।

वडाभित्र निर्माण सुरु भएको एकीकृत वस्तीको काम कुन चरणमा पुग्यो ?
अहिले धमाधम काम भइरहेको छ । अहिलेसम्म ३० वटा घरहरु डिपिसी भइसकेको छ । साथै बाँकी काम तीब्र गतिमा अगाडि बढेको छ । एकीकृत वस्तीको लागि हामीले १० लाख छुट्याएका छौँ । एकीकृत नमूना वस्ती गाउँपालिकाकै पहिलो हो । यो वस्तीलाई पर्यटकीय स्थानको रुपमा विकास गरेर लैजाने योजना छ ।

गाउँपालिकालाई समृद्ध बनाउने तपाईले आफ्नो वडामा के–के आधार तयार गर्नुभयो ?
हामीले समृद्ध गाउँपालिका निर्माण गर्नको लागि लक्ष्य लिएका छौं । हाम्रो वडामा सिमेन्ट उद्योग सञ्चालन गर्नको लागि कच्चा पदार्थ रहेको छ । अहिलेसम्मको अध्ययन अनुसार सिमेन्ट उद्योग सञ्चालन गर्न उपयुक्त ढुंगोहरु छ । यसको लागि थप अध्ययन अनुसन्धान गर्ने कामलाई अगाडि बढाउने तयारी गरेका छौं । यस क्षेत्रमा सिमेन्ट उद्योग सञ्चालन गर्न सकेको अवस्थामा दोरम्बा गाउँपालिका समृद्ध बन्छ । कुनै शका नै छैन् । गुन्साको बुलबुले, दाउने, कामाधेनु महादेव एरिया ३ हेक्टर भन्दा बढी स्थानमा सिमेन्ट उद्योग सञ्चालन गर्ने ढुंगा रहेको छ ।

चौरी खोलामा बषैँ अगाडि सुरु भएको पक्की पुल निर्माण नहुदा जनताले निकै ठूलो सास्ता पाएका छन, तपाइले अहिलेसम्म के गर्नुभयो  ? 
–बारम्बार ठेकेदार कम्पनीलाई दबाब दिएपछि अहिले पुल निर्माणको कामले गति लिएको छ । मलाई विश्वास छ यस बर्षबाट चौरीखोलाको पक्की पुल सञ्चालनमा आउछ ।

कृषि क्षेत्रको सुधार लागि के गर्नुभयो र के गर्दै हुनुहुन्छ ?
कृिषलाई आधुनिकिकरण गर्न काम आगाडि बढाएका छौं । कृषि क्षेत्रलाई व्यवसायीक बनाउनको लागि कृषि फर्म बनाएका छौं । कृषि क्षेत्रलाई उद्योगकै रुपमा अगाडि बढाउने योजना छ । कृषि क्षेत्रमा कसरी लगानी गर्ने गरेको लगानीलाई कसरी परिणाममुखी बनाउने भन्ने विषयमा हामी वडावासीहरुसँग परामर्श गरिरहेका छन् । एक ठाउँमा नमूनाको रुपमा देखाउन सके बाँकी त्यहीँबाट अरुले पनि पाठ सिक्न सक्छन भन्ने हाम्रो निष्कर्ष छ ।

गुरासे क्षेत्रमा चिया बगानको कुरा पनि आएको थियो नि ?
चिया बगानको काम पनि हुँदैछ । भौगोलिक र हावापानी चिया खेतीको लागि योग्य भएको कारण हामीले चियाखेतीको प्रस्ताव अगाडि सारेका हौं । यस बर्ष चिया बगानको सम्भाव्यता अध्ययन गर्नको लागि बजेट छुटयाउछौ ।

निर्वाचनमा गरेको प्रतिबद्धता अनुसार काम अगाडि बढाउन सक्नु भयो कि भएन ?
–निर्वाचनमा गरेको प्रतिबद्धता अनुसार नै काम गरेको छु । वडामा नियमित रुपमा बसेर जनताको सेवा गरेको छ । सामाजिक सुरक्षा भक्त घरघरमा नै आफै पुगेर वितरण गरेको छ । हामीले जनताको सेवा गर्छु भनेर प्रतिबद्धता गरेर आएपछि काम त गर्नु नै पर्यो नि । मेरो कारणले नागरिकहरुले दुःख पाउनुनभएको छैन् । वडाको विकासको लागि लागेको छ । केही दिर्घकालिन योजना अगाडि बढाउन समय पनि लाग्ने रहेको छ । जिम्मेवारी सम्हालेको यस अवधिमा वडालाई समृद्ध बनाउने आधार तयार गरेका छौं । वडाको विकासले गाउँपालिकालाई नै समृद्धि बनाउन सकिन्छ भन्ने मेरो विश्वास छ ।