प्रथम रामेछाप फुटबल लिगको सदस्य सचिव घिसिङद्धारा उदघाटन

२३ मंसिर, रामेछाप ।
रामेछापमा आजबाट प्रथम रामेछाप फुटबल लिग प्रतियोगीता सुरु भएको छ । सदरमुकाम मन्थलीस्थ्ति हाटेचौरमा सुरु भएको प्रतियोगीताको राष्ट्रिय खेलकुद परिषदका सदस्य सचिव टंकलाल घिसिङले उदघाटन गरेका हुन् । रामेछाप जिल्ला खेलकुद विकास समितिकोले आयोजना गरेको प्रतियोगीतामा विभिन्न १२ टिमको सहभागीता रहेको छ ।

समितिका अध्यक्ष सुन्दर घिमिरेले जिल्लामा अखिल नेपाल फुटबाल संघ (एन्फा)को शाखा विस्तारको लागि भूमिका खेल्न प्रतियोगीता आयोजना गरेको बताए । उनका अनुसार खेल शनिवारसम्म सञ्चालन हुनेछ । प्रतियोगीताको प्रथम पुरस्कार एक लाख द्धितिय पुरस्कार ७५ हजार र तृतिय पुरस्कार ५० हजार राशीको रहेको छ ।

उदघाटन कार्यक्रममा जिल्ला समन्वय समिति रामेछापका प्रमुख प्रेम बहादुर खड्का, जिल्ला प्रहरी कार्यालय रामेछापका डिएसपी नवराज ढुंगाना, नेपाली कांग्रेस रामेछापका उपसभापति लेखबहादुर कार्की, नेकपा एमाले रामेछापका सचिव आनन्द श्रेष्ठ लगायतको सहभागीता रहेको थियो ।