रामेछापमा बोलेरो गाडी दुर्घटनाः ५ जनाको मृत्यु, एक दर्जन घाइते

२३ चैत्र, रामेछाप ।

रामेछापको मन्थली नगरपालिका–७ भटौली स्थित कौछिनीमा बोलेरो दुर्घटना हुँदा पाँच जनाको मृत्यु भएको छ । आज सदरमुकाम मन्थलीबाट भटौलीको कौछिनी जादै गरेको बोलेरो गाडी दुर्घटना हुँदा चालकसहित पाँच जनाको मृत्यु भएको हो । चार जनाको घटनास्थलमै र थप एक जनाको उपचारको क्रममा अस्पतालमा मृत्यु भएको जिल्ला प्रहरी कार्यालय रामेछापले बताएको छ ।

मृत्यु हुनेहरुमा मन्थली नगरपालिका–७ भटौली कौछिनीकी ८२ वर्षिया नन्दमाया भण्डारी, ५५ वर्षकी ज्ञान दानी तामाङ, ६८ वर्षका जनसुन तामाङ र सुनापति गाउँपालिका वडा नं १ गुन्सीकी ८ वर्षकी लाक्पा घिसिङ र चालक मन्थली नगरपालिका–।७ कौछेनी बस्ने वर्ष ५० को दल बहादुर आलेमगर रहेको जिल्ला प्रहरी कार्यालय रामेछापका डिएसपी होम बहादुर पराजुलीले बताए ।

सदरमुकाम मन्थलीबाट १५ जना यात्रु बोकेर मन्थली नगरपालिका वडा नं ७ भटौलीको कौछिनी जाँदै गरेको बा ११ च ५५३ नम्बरको बोलेरो कौछिनी स्थित मगर टोलमा दुर्घटना भएको थियो । प्रहरीका अनुसार उकालो मोडमा ब्रेक फेल भएको कारण दुर्घटना भएको देखिएको छ । दुर्घटनामा परी गम्भीर घाइते भएका ३ जनालाई थप उपचारका लागि काठमाडौं पठाइएको प्रहरीले बताएको छ ।