सुनापति गाउँपालिकाको उच्चस्तरीय कार्यक्रम वडाअध्यक्षहरुबाटै बहिष्कार

१७ चैत्र, रामेछाप ।
सुनापति गाउँपालिकाले आयोजना गरेको उच्चस्तरीय छलफल कार्यक्रम नै वडाअध्यक्षहरुले बहिष्कार गरेका छन् । गाउँपालिकाले कार्यक्रम गर्ने तय गरेपनि प्रमुख प्रशासकीय अधिकृत सुरेश कुमार श्रेष्ठले समन्वय नगरेको कारण आफूहरु कार्यक्रममा उपस्थित हुन नसकेको वडाअध्यक्षहरुले बताएका छन् । कार्यपालिकाको बैठकमा कार्यपालिकाका सदस्यहरुलाई बोलाउने अधिकार प्रमुख प्रशासकीय अधिकृतलाई सचिवको जिम्मेवारी तोकिएको हुन्छ ।

तर भक्तपुरको गठ्ठाघरस्थित जर्मन होम्स हस्पिटालिटीमा आयोजित कार्यक्रममा वडाअध्यक्षहरु नै अनुपस्थित भएपछि सहभागीहरुले वडा अध्यक्षहरुको खोजी गरेका थिए । कार्यक्रममा वडाअध्यक्षहरुलाई खबर नगरिएको कारण सहभागी नभएको सुनापति गाउँपालिका–४ बेथानका वडाअध्यक्ष डण्डुप तामाङले रामेछाप न्युजलाई बताए । उनले भने,‘हामी कार्यपालिको सदस्य हौ, कार्यक्रममा सहभागी हुन काठमाडौं आएको पनि हो, प्रमुख प्रशासकीय अधिकृतबाट कुनै खबर पनि आएन, कार्यक्रम कसरी गर्ने र कस्तो गर्ने छलफल भएन, त्यसपछि म कार्यक्रममा गइन ।’

कार्यक्रममा किन सहभागी हुनु भएन भन्ने प्रश्नमा सुनापति गाउँपालिका–२ दिमीपोखरीका वडाअध्यक्ष पदम थापामगरले भने,‘म काठमाडौं आएको थिए, कार्यक्रममा सहभागी हुने विषयमा खबर आएन, नबोलाइन जाने कुरा भएन, त्यही भएर म गइन ।’ उनले पालिकाभित्र कतिपय कुरा नमिलेको बताउदै आगामी कार्यपालिका बैठकमा कुरा उठाउने समेत बताए ।
पालिकालाई राम्रो कसरी बनाउन सकिन्छ र बजेट कसरी बढाउन सकिन्छ ? भन्ने प्रतिबद्धताको लागि कार्यक्रम आयोजना गरेपनि कांग्रेस, एमाले र र माओवादीका नेताहरुबीच विगतमा गरेको कामको जस लिने होडबाजी मात्र चलेको थियो । जसले गर्दा कार्यक्रम जुन उद्देश्यले गरिएको हो, सो अनुरुप हुन नसकेको बताइएको छ । खासमा पालिकाको विकास निर्माणमा बजेट हाल्नको लागि प्रतिबद्धता जनाउने कार्यक्रम रहेपनि सहभागी राजनीतिक दलका नेताहरुले आ–आफ्नो सुझाव मात्र दिएका थिए ।

यसो त विगतमा पनि पालिकाले यसै हलमा कार्यक्रम गरेको थियो । त्यति बेला पनि सुझाव संकलन गरिएको थियो । तर त्यति बेलाको सुझाव कार्यान्वयन नहुँदै पुनः उच्चस्तरीय छलफलको औचित्यमाथि पनि प्रश्न उठेको छ ।
गाउँपालिकाको केन्द्र हिलेदेवीमा कार्यक्रम आयोजना गर्दा सबैको सहभागी नहुने निष्कर्ष निकाल्दै कार्यपालिकाको बैठकले भक्तपुरमा कार्यक्रम गर्ने तय गरेको थियो । तर तीन/चार दिन अघिबाट कर्मचारीहरु कार्यालय नै बन्द गरेर काठमाडौं आएर बसेको बताइएको छ । गाउँपालिकामा सेवा बन्द गरेर कर्मचारीहरु तीन/चार दिनदेखि काठमाडौंमा बसेकोप्रति वडाअध्यक्षहरुले प्रश्न उठाएका छन् ।

सुनापति गाउँपालिकाका प्रमुख प्रशासकीय अधिकृत सुरेश श्रेष्ठले पालिकाले नै आयोजना गरेको कार्यक्रममा वडाअध्यक्षहरु सहभागी नभएको स्वीकार गरे । उनले रामेछाप न्युजसँग भने,‘कार्यपालिकाको सचिवको हैसियतमा मैले कार्यपालिकाका सदस्यहरुलाई खबर गर्नुपर्ने हो, अध्यक्षज्यूको सचिवालयले गरेको होला भनेर बसेको थिए, कार्यक्रम वडाअध्यक्षहरु नआएपछि मैले आज बिहान फोन गरेको थिए ।’
कार्यक्रममा वडा नम्बर १ का वडाअध्यक्ष धु्रव चौलागाई बाहेक अन्य वडाअध्यक्षहरुसँगै बहुमत कार्यपालिकाका सदस्यहरु सहभागी थिएनन । सुनापति गाउँपालिका–५ का वडाअध्यक्ष चित्र बहादुर मानन्धरले आफू काठमाडौंमा भएता पनि खबर नभएको कारण कार्यक्रममा सहभागी नभएको बताए । यसबाट पनि कार्यपालिकाका सदस्यहरु र प्रमुख प्रशासकीय अधिकृतको बीचमा रहेका मतभेद बाहिर प्रष्ट देखिएको छ ।