उद्यमशीलता तालिम सम्पन्न

काठमाडौँ १६, चैत्र ।
चिसापानी जनकल्याण समाजद्वारा राजधानीमा आयोजित एक हप्ते उद्यमशीलता तथा बित्तीय साक्षरता तालिम शनिबार सम्पन्न भएको छ । चैत १० गतेदेखि सुरु भएको तालिममा रामेछाप जिल्लाको मन्थली नगरपालिकाबाट राजधानीमा आइ बसोबास गर्दै आएका २४ युवाको सहभागिता रहेको थियो ।
चिसापानी जनकल्याण समाजका अध्यक्ष राजेन्द्र श्रेष्ठका अनुसार, मन्थली नगरपालिकाको आर्थिक सहयोग तथा राष्ट्रिय युवा परिषद–नेपालको प्राविधिक सहयोगमा तालिम आयोजना गरिएको हो । मन्थली नगरपालिकाका उपप्रमुख ईश्वरी बस्नेतले तालिमका सहभागीलाई शनिबार प्रमाणपत्र वितरण वितरण गर्नुभयो ।

सात दिनको तालिममा डिल्लेश्वर प्रधान र प्रकाशकुमार श्रेष्ठले उद्यम गर्नुअघिको तयारी, बजार तथा उपभोक्ता अध्ययन, व्यवसायमा आउनसक्ने जोखिम र त्यसको व्यवस्थापनलगायत व्यवसायिक योजना कसरी बनाउने विषयमा प्रशिक्षण दिनुभएको थियो । सो तालिमको उद्घाटन मन्थली नगरपालिकाका प्रमुख लव श्रेष्ठले गर्नुभएको थियो ।
रामेछाप जिल्लाको चिसापानीबाट राजधानीमा आइ बसोबास गरिरहेका युवाले २०५२ सालमा चिसापानी जनकल्याण समाज स्थापना गरेका थिए । सो संस्थाले रक्तदान, स्वास्थ्य शिविरलगायत सामाजिक सेवाका क्षेत्रमा कार्य गर्दै आइरहेको छ ।